Qazın işçiləri evdə yoxlanış keçirə bilərmi?

1. Ümumi izah

Bəli buna görə bildiriş göndərilməldir, Qaz paylayıcısının işçiləri tərəfindən istehlakçıya 5 iş günü əvvəl bildiriş göndərməklə ildə bir dəfə texniki baxış keçirə bilər. Texniki baxış iki nüsxədə tərtib edilməlidir. Bu texniki baxışın keçirilməsi ödənişsizdir.

İstəhlakçı havalandırma və havadəyişmə xətlərində nöqsan və (və ya) pozuntular aşkar edildikdə istehlakçının müraciəti əsasında təkrar müayinə 3 iş günündən gec olmayaraq aparılmalıdır.

İstehlakçı təkrar müayinə üçün il ərzində 1 dəfədən çox müraciət edərsə növbəti müayinə ödənişli keçirilir. Ödənişin məbləği paylayıcı ilə istehlakçı arasında bağlanmış müqavilə ilə müəyyən edilir. Eləcə də, qaydalara əsasən istehlakçı qaz paylayıcısının işçilərinin xidməti vəsiqələrini təqdim etdikləri təqdirdə müayinə keçirilməsi üçün onun mülkiyyətində və ya istifadəsində olan tikinti obyektinə daxil olmasına maneə törətməməli və müayinənin keçirilməsinə şərait yaratmalıdırlar.

Qanuna əsasən istehlakçı işçiləri müayinə keçirilməsi üçün onun mülkiyyətində və ya istifadəsində olan tikinti obyektinə daxil olmasına maneə törətdikdə və ya müayinənin keçirilməsinə şərait yaratmadıqda qazın verilməsi dayandırılır.

2. Qanuni əsas

Qaz təchizatı haqqında qanuna əsasən işçilər istehlakçıya 5 (beş) iş günü əvvəl sifarişli poçt göndərişi və ya istehlakçının əvvəlcədən razılığı ilə elektron poçt və ya digər elektron kommunikasiya vasitələri ilə bildiriş təqdim etməklə (göndərməklə) ildə bir dəfə (hər il noyabrın 1-dək) müayinə keçirilməsini təmin etməli, nəticəsi barədə müvafiq icra hakimiyyəti оrqаnının müəyyən etdiyi orqanın (qurumun) təsdiq etdiyi formada 2 (iki) nüsxədə müayinə aktını istehlakçının (və ya onun səlahiyyətli nümayəndəsinin, yaxud yetkinlik yaşına çatmış ailə üzvlərindən birinin) iştirakı ilə tərtib etməli və aktın bir nüsxəsini istehlakçıya (və ya onun səlahiyyətli nümayəndəsinə, yaxud eyni ünvanda yaşayan yetkinlik yaşına çatmış ailə üzvlərindən birinə) təqdim etməlidir. İşçilər tərəfindən müayinə ödənişsiz həyata keçirilir. İstehlakçı işçiləri müayinə keçirilməsi üçün onun mülkiyyətində və ya istifadəsində olan tikinti obyektinə daxil olmasına maneə törətdikdə və ya müayinənin keçirilməsinə şərait yaratmadıqda qazın verilməsi dayandırılır.

Qazdan istifadə Qaydalarının təsdiq edilməsi haqqında Nazirlər Kabinetinin 12 may 2011-ci il tarixli, 80 nömrəli qərarına əsasən Qaz paylayıcısının işçiləri tərəfindən istehlakçıya 5 (beş) iş günü əvvəl sifarişli poçt göndərişi və ya istehlakçının əvvəlcədən razılığı ilə elektron poçt və ya digər elektron kommunikasiya vasitələri ilə bildiriş təqdim edildikdə (göndərildikdə), istehlakçı işçilərin xidməti vəsiqələrini təqdim etdikləri təqdirdə müayinə keçirilməsi üçün onun mülkiyyətində və ya istifadəsində olan tikinti obyektinə daxil olmasına maneə törətməməli və müayinənin keçirilməsinə şərait yaratmalıdırlar.

3. Hüquqi yardım

Azəriqaz tərəfindən aşkarlanan nöqsan ilə razı olmadığınız təqdirdə, eləcə də, əsassız yazılan qaz borcuna görə orqanın özünə şikayət ünvanlaya bilərsiniz. Şikayətə müsbət cavab almadığınız təqdirdə məhkəməyə iddia ərizəsi ilə müraciət etmək hüququnuz var. İtehlakçı hüquqlarının pozulmasına görə məhkəməyə müraciət zamanı dövlət rüsumu yoxdur. İddia ərizəsinin hazırlanması üçün hüquqşünas və vəkillərə müraciət edə bilərsiniz.